АНУ руу нисэх хүмүүст Ардчилсан Конгод зорчоогүй тухай мэдүүлэг шаардана

АНУ-ын Өвчний хяналт, урьдчилан сэргийлэх төв (CDC) гадаад улсаас АНУ руу нисэх хүмүүс сүүлийн 21 хоногт Бүгд Найрамдах Ардчилсан Конго Улсад байгаагүйгээ мэдүүлэх шаардлагын тайлбарыг аравдугаар сарын 30-нд нийтэллээ. Энэ нь Конгод дэгдсэн Эболаг агаарын тээврээр АНУ-д нэвтрүүлэх эрсдэлийг бууруулах арга хэмжээ юм.

Хэзээнээс, хэнд үйлчлэх вэ?

Шаардлага АНУ-ын зүүн эргийн стандарт цагаар арваннэгдүгээр сарын 3-ны 23:59 буюу Улаанбаатарын цагаар арваннэгдүгээр сарын 4-ний 12:59-өөс гадаад улсаас АНУ руу хөөрөх нислэгүүдэд үйлчилнэ. Тушаал өөрчлөгдөх, цуцлагдахгүй бол арванхоёрдугаар сарын 18-ны 23:59 EST хүртэл хүчинтэй.

Иргэншлээс үл хамааран хамрагдана: Монголын болон АНУ-ын иргэд, ногоон карттай байнгын оршин суугчид, АНУ-аар өөр улс руу дамжин нисэгчид үүнд орно. Аравдугаар сарын 28-ны нэмэлт өөрчлөлтөөр зорчигч төдийгүй зорчигч, ачааны онгоцны багийнхан ч хамрагдахыг тодруулжээ. Анхны тушаал аравдугаар сарын 22-нд гарсан байна.

Ямар мэдүүлэг өгөх вэ?

Attestation-ийг цаасан эсвэл цахим хэлбэрээр өгнө. Агаарын тээвэрлэгч үүнийг цуглуулах бөгөөд зорчигч өөрийн компанийн зааврыг урьдчилан шалгах хэрэгтэй гэж CDC зөвлөжээ. Мэдүүлэг өгөөгүй, тусгай чөлөөлөлтгүй хүнийг онгоцонд суулгахгүй.

Конгын нисэх буудлаар дамжсан, онгоцноосоо буугаагүй байсан ч тус улсад байсан гэж тооцно. Конгоос гарсан өдрийг 0 дэх өдөр гэж тоолж, гадна нь бүтэн 21 хоног өнгөрсний дараах 22 дахь өдрөөс бусад шаардлагыг хангасан хүн нисэж болно.

АНУ-ын Засгийн газрын зөвшөөрөлтэй Эбола өвчтөний агаарын эмнэлгийн тээвэр, CDC-ээс хүмүүнлэгийн болон төрийн чухал үндэслэлээр олгосон чөлөөлөлт тусдаа үйлчилнэ. Энэ мэдүүлгийн шаардлага хуурай газрын хил, далайн боомтод хамаарахгүй.