Энэтхэгт iPhone-ийн эд анги үйлдвэрлэдэг үйлдвэрт гурван ажилтан нас баржээ

Энэтхэгийн өмнөд хэсгийн Тамил Наду мужид, Хосур хотын ойролцоох Tata Electronics-ийн үйлдвэрт арваннэгдүгээр сарын 9-ний орой гэрээт гурван ажилтан нас баржээ. Тэд үйлдвэрийн бохир ус шүүх саванд цэвэрлэгээ, засвар үйлчилгээ хийж байсан гэж Кришнагири дүүргийн захиргааны тэргүүн Ч. Динеш Кумар The New Indian Express-т мэдээлэв. Тус үйлдвэр Apple-ийн iPhone утасны эд анги үйлдвэрлэдэг гэж Reuters мэдээлсэн.

Дүүргийн захиргааны тэргүүний тайлбарласнаар нэг ажилтан савыг шалгах үед ухаан алдаж, араас нь туслахаар очсон хоёр ажилтан мөн унажээ. NDTV-ийн цагдаагаас авсан мэдээллээр үйлдвэрийн аврах баг гурвууланг гаргаж, анхны тусламж үзүүлсний дараа Хосурын эмнэлэгт хүргэсэн ч эмч нар тэднийг нас барсныг тогтоосон байна.

Цагдаа урьдчилсан шалгалтаар хорт хий амьсгалсан байж болзошгүй гэж үзэж байгаа ч үхлийн шалтгааныг задлан шинжилгээний эцсийн дүгнэлтээр тогтооно гэж The New Indian Express мэдээлэв. Дүүргийн захиргаа ажлын байрны аюулгүй ажиллагааг шалгаж байна. Тамил Надугийн аж үйлдвэрийн сайд ослыг шалгаж, дүнгээс хамаарч арга хэмжээ авна гэж мэдэгдсэнийг Reuters уламжилжээ.