SoundHound ажилтнуудынхаа 27%-ийг цомхотгох төлөвлөгөө эхлүүлжээ

Дуу хоолойгоор харилцах хиймэл оюуны үйлчилгээ хөгжүүлэгч SoundHound AI (Nasdaq: SOUN) дэлхий даяарх ажилтнуудынхаа ойролцоогоор 27%-ийг цомхотгох төлөвлөгөө хэрэгжүүлж эхэлснээ арваннэгдүгээр сарын 5-ны албан мэдүүлэгтээ мэдээллээ. Төлөвлөгөөг арваннэгдүгээр сарын 4-нд эхлүүлсэн бөгөөд үндсэн ажлуудыг 2026 оны эцэс гэхэд дуусгахаар тооцжээ.

Зарим улсын хөдөлмөрийн хууль, ажилтнуудтай зөвшилцөх шаардлага болон бизнесийн хэрэгцээнээс шалтгаалан аль ажлын байрыг хасахыг эцэслэнэ. Иймээс 27%-ийн цомхотгол бүрэн дууссан гэж компани мэдээлээгүй байна.

Өсөлтийн хажуугаар зардлаа бууруулна

Есдүгээр сарын 30-нд дууссан III улирлын орлого жилийн өмнөхөөс 48.5% өсөж, 62.4 сая доллар болжээ. АНУ-ын нягтлан бодох бүртгэлийн GAAP зарчмаар тооцсон цэвэр алдагдал 46.4 сая доллар байв.

Цомхотголтой холбоотой татварын өмнөх зардлыг 18–22 сая доллар, үүнээс бэлэн мөнгөөр гарах хэсгийг 16–19 сая доллар гэж урьдчилан тооцсон байна. Ихэнх нь ажлаас чөлөөлөгдсөний тэтгэмж болон холбогдох олговор бөгөөд IV улиралд бүртгэж, олгохоор төлөвлөжээ.

SoundHound есдүгээр сарын 4-нд LivePerson компанийг худалдан авах хэлцлээ дуусгасан. Одоо нэгтгэсэн бизнесийн зардлыг бууруулж, алдагдалтай зарим гэрээг сунгахгүй байх, лицензийн нэг удаагийн төлбөрөөс тогтмол үйлчилгээний загварт шилжихээр ажиллаж байгаагаа тайлбарлав.

Ашгийн зорилт нь ирэх оны төсөөлөл

Компани 2027 оны хоёрдугаар хагаст adjusted EBITDA-г тогтвортой эерэг болгохоор зорьж байна. III улиралд энэ үзүүлэлтээр 20.7 сая долларын алдагдалтай байжээ.

Цомхотголын бодит зардал, хэрэглэгчдээ хадгалж чадах эсэх, үйлчилгээний загварын өөрчлөлт нь уг зорилтын хэрэгжилтийг тодорхойлно.