Occidental Пермийн сав газрын олборлолтод ашиглах CO₂ нийлүүлэх хоёр гэрээ байгууллаа

Occidental Petroleum (NYSE: OXY) арваннэгдүгээр сарын 9-нд нүүрсхүчлийн хий (CO₂) нийлүүлэх урт хугацааны хоёр гэрээ байгуулснаа зарлалаа. Төсөл хэрэгжүүлэгчид Делавэрийн сав газрын байгалийн хий боловсруулах үйлдвэрүүдээс CO₂ ялган авч, тээвэрлэн нийлүүлэх дэд бүтцийг өөрсдөө санхүүжүүлж, барина гэж Occidental мэдээлэв.

Компани нийлүүлсэн хийг Пермийн сав газрын одоо ажиллаж буй ордуудад enhanced oil recovery буюу олборлолтыг нэмэгдүүлэхэд ашиглана. CO₂-ыг газрын тос агуулсан давхаргад шахахад үлдсэн тос цооног руу урсахад дөхөм болдог.

Хоёр төсөл жилд нийлээд 2 сая орчим тонн CO₂ ялган авч, тээвэрлэхээр тооцжээ. Цаашид энэ хэмжээг 4 сая тонн хүртэл нэмэгдүүлэх боломжтой гэж компани үзэж байна. Мөн Делавэрийн сав газарт 160 орчим км шинэ хоолой тавьж, одоогийн сүлжээтэй холбохоор төлөвлөжээ.

Гэрээнүүд байгуулагдсан ч төслүүдэд хөрөнгө оруулах эцсийн шийдвэр гараагүй байна. Occidental анхны нийлүүлэлтийг 2029 онд хүлээж байгаа бөгөөд мэдэгдэлдээ эдгээр гэрээгээр олборлолт хэдээр нэмэгдэх тооцоо дурдаагүй.