АНУ-ын дизель зэрэг түлшний нөөц 3.6 сая баррелиар буурав

АНУ-ын дизель, халаалтын түлш зэрэг бүтээгдэхүүний нөөц нэг долоо хоногт 3.6 сая баррелиар буурч, 99.3 сая баррель болсон гэж Эрчим хүчний мэдээллийн алба (EIA) 11 дүгээр сарын 4-нд мэдээллээ. Энэ нь 10 дугаар сарын 30-наар дууссан долоо хоногийн үзүүлэлт юм.

Тайланд Distillate fuel oil гэж нэрлэсэн энэ ангиллын нөөц сүүлийн таван жилийн тухайн үеийн дунджаас 13% бага байна. Тиймээс 3.6 сая баррелийн бууралтыг дан ганц дизелийн нөөцийн өөрчлөлт гэж ойлгож болохгүй.

Түүхий тос, бензиний нөөц мөн буурлаа

Засгийн газрын стратегийн нөөцийг оруулаагүй арилжааны түүхий тосны нөөц 865 мянган баррелиар буурч, 409.8 сая баррель болов. Энэ нь таван жилийн тухайн үеийн дунджаас 4% доогуур түвшин юм.

Бензиний нөөц 222 мянган баррелиар багасаж, 209 сая орчим баррель болжээ. Харин арилжааны газрын тос, бүтээгдэхүүний нийт нөөц 8.2 сая баррелиар буурсан байна.

Үүний зэрэгцээ боловсруулах үйлдвэрүүдэд нийлүүлсэн түүхий тосны хэмжээ өмнөх долоо хоногоос хоногт 199 мянган баррелиар нэмэгдэж, 16.7 сая баррельд хүрэв. Үйлдвэрүүд хүчин чадлынхаа 94.5%-ийг ашигласан гэж EIA мэдээлжээ.